महाड, (संजय भुवड) -22 व 23 जुलै 2021 रोजी झालेल्या दरड कोसळण्याच्या घटनेमध्ये महाड तालुक्यातील तळीये गावावर आलेल्या भीषण संकटानंतर येथील 271 नागरिकांना शासनाच्या म्हाडा यंत्रणेमार्फत घरे बांधून देण्याची कामे आता वेगात सुरू झाली असून येत्या पावसाळ्यापूर्वी यापैकी 227 घरे पूर्ण होतील असा विश्वास म्हाडाच्या अधिकाऱ्यांकडून व्यक्त करण्यात आला आहे. दरम्यान उर्वरित 44 घरांसाठी आवश्यक असलेल्या जमिनीचे प्रस्ताव जिल्हा प्रशासनाकडे देण्यात आल्याची माहिती प्राप्त झाली आहे.
22 व 23 जुलै 2021 रोजी तळीये येथे झालेल्या या भीषण दुर्घटनेमध्ये 80 पेक्षा जास्त ग्रामस्थांना आपले प्राण गमवावे लागले होते. या भीषण दुर्घटनेची गंभीरता लक्षात घेऊन तत्कालीन मुख्यमंत्री उद्धव ठाकरे यांनी तातडीने घटनास्थळी धाव घेऊन दुर्घटनाग्रस्त नागरिकांचे सांत्वन केले होते.यानंतर म्हाडा विभागाचे तत्कालीन मंत्री जितेंद्र आव्हाड यांनी या ठिकाणी आपल्या विभागामार्फत घरे बांधून देण्याची घोषणा केली होती. त्यानुसार ट्रान्सकॉन डेव्हलपर्स या कंपनीला जून 22 रोजी या कामांची वर्क ऑर्डर देण्यात आली मात्र सुरू असलेल्या पावसामुळे प्रत्यक्षात नोव्हेंबर 22 मध्ये या कामांना सुरुवात झाली.मागील वर्षी लोणेरे येथील भारतरत्न डॉ. बाबासाहेब आंबेडकर तंत्रशास्त्र विद्यापीठात झालेल्या एका विशेष कार्यक्रमात तळीये येथील ग्रामस्थांना त्यांच्या घरांच्या चाव्या सुपूर्द करण्यात आल्या होत्या. एकूण 271 पैकी पहिल्या टप्प्यामध्ये 66 घरांचे हस्तांतर करण्यात आले असून या ठिकाणी ग्रामस्थ निवास करीत आहेत, उर्वरित 92 घरांच्या करिता म्हाडा विभागाकडून ना हरकत तयार करण्यात आली असल्याचे सांगण्यात आले.
या संदर्भात प्रत्यक्ष घटनास्थळी दिलेल्या भेटीदरम्यान 200 पेक्षा जास्त घरांचे आरसीसी काम पूर्ण झाल्याचे पहावयास मिळाले, यापैकी 170 पेक्षा जास्त ठिकाणी स्ट्रक्चर उभारण्यात आले असून पॅनलची कामे सुरू आहेत. मागील दोन वर्षात ज्या जागांवर कंटेनर मधून या दुर्घटनाग्रस्त ग्रामस्थांना राहावे लागत होते त्या ठिकाणी सदरचे कंटेनर दूर करावेत याकरता जिल्हा प्रशासनाकडे प्रस्ताव देण्यात आले असल्याची माहिती या सूत्रांनी दिली आहे, कंटेनर परिसरातील जागा मोकळी झाल्यास या ठिकाणी किमान 25 ते 27 घरांची निर्मिती शक्य होणार आहे. घरांच्या एकूण निर्मितीबाबत येत्या पावसाळ्यापूर्वी कोणत्याही परिस्थितीत 227 घरांची निर्मिती करून त्यांचे हस्तांतरण करण्याची प्रक्रिया पूर्ण होईल असा विश्वास या म्हाडाच्या अधिकाऱ्यांनी बोलून दाखविला . उर्वरित 44 घरांकरिता जिल्हा प्रशासनाकडे जमिनी संदर्भातील प्रस्ताव दिल्याची माहिती त्यांनी दिली. या कामासाठी म्हाडा विभागाने सुमारे 52 कोटी रुपयांचे अंदाजपत्रक दिले होते त्या पश्चात शासनाने 263 अधिक आठ मिळून 271 घरांसाठी सुमारे 77 कोटी रुपयांच्या प्रशासकीय प्रस्तावास मंजुरी दिली आहे .या ठिकाणी घरांची निर्मिती वगळता अन्य कामे जसे पाणी, रोड, दिवाबत्ती, ही रायगड जिल्हा परिषदे कडून करण्यात येणार आहेत असे या अधिकाऱ्यांनी स्पष्ट केले. एकूणच मागील तीन वर्षापासून येथील ग्रामस्थांवर आलेल्या या नैसर्गिक आपत्तीच्या पार्श्वभूमीवर शासनाकडून देण्यात येणाऱ्या घरांचे हस्तांतरण येत्या पावसाळ्यापूर्वी होणार असल्याने या पावसाळ्यात स्थानिकांना आपली हक्काची घरी प्राप्त होतील हे स्पष्ट झाले आहे.
