سوال: کیا سورۃ البقرہ کو گھر میں مخصوص دنوں کے لیے ریکارڈر، کمپیوٹر یا دوسرے ڈیجیٹل پلیئر پر بلند آواز سے بجانے سے شیاطین کے گھر میں داخل ہونے سے روکا جا سکتا ہے یا گھر کے کسی فرد کے لیے حقیقت میں تلاوت کرنا ضروری ہے؟

جواب:
سورۃ البقرہ کی تلاوت کے بارے میں جو احادیث مبارکہ وارد ہوئی ہیں، ان سے ظاہر ہوتا ہے کہ شیطان اس گھر سے بھاگ جاتا ہے جہاں خود سے تلاوت کی جاتی ہے، نہ کہ صرف ڈیجیٹل آلات سے آواز چلانے پر۔ اس لیے کہ اصل میں گھروں میں قرآن کی تلاوت مقصود ہے نہ کہ صرف سماعت۔

صحیح مسلم میں حضرت ابو ہریرہؓ سے روایت ہے کہ رسول اللہ ﷺ نے فرمایا:

“شیطان اس گھر سے بھاگ جاتا ہے جس میں سورۃ البقرہ کی تلاوت کی جاتی ہے۔“
(صحیح مسلم: 780)

شیخ ابن عثیمین رحمہ اللہ سے اس بارے میں سوال کیا گیا کہ اگر سورۃ البقرہ کو ریکارڈ شدہ آواز میں چلایا جائے تو کیا شیطان گھر سے دور ہوگا؟ تو انہوں نے جواب دیا:

“نہیں، یہ کافی نہیں ہے، کیونکہ یہ تلاوت شمار نہیں ہوتی بلکہ یہ ایک پرانی ریکارڈنگ سننا ہے۔“

لہٰذا، گھر میں سورۃ البقرہ کی تلاوت کا اصل مقصد یہ ہے کہ کوئی فرد خود قرآن پاک کی تلاوت کرے۔ ریکارڈنگ سننا باعث خیر و برکت ضرور ہے، لیکن وہ احادیث میں مذکور فضیلت کو حاصل نہیں کرے گا۔

مزید وضاحت:
رسول اللہ ﷺ نے فرمایا:

“لا تجعلوا بيوتكم مقابر، یعنی گھروں کو تلاوت سے خالی نہ چھوڑو، کیونکہ جس گھر میں قرآن نہیں پڑھا جاتا، وہ قبرستان کی طرح ہوتا ہے۔**”
[روح البیان ٤٨٩/٥]
[المفاتيح في شرح المصابيح ٣/‏٧٠]

بجيرمی فرماتے ہیں:

“قصد السماع یعنی تلاوت کے لیے نیت ضروری ہے، اور وہ شخص تلاوت کرے جو اس مقصد کو پورا کر رہا ہو، نہ کہ کسی ماضی کی ریکارڈنگ کو سننا۔**”
[بجيرمي على الخطيب ٤٣٣/١]

شیخ محمد بن صالح العثیمین رحمہ اللہ سے سوال کیا گیا:

“کیا سورۃ البقرہ کی ریکارڈنگ چلانے سے شیطان گھر سے دور ہوگا؟“

انہوں نے جواب دیا:

“نہیں، یہ کافی نہیں ہے، کیونکہ صوت الشريط (ریکارڈ شدہ آواز) تلاوت کے زمرے میں نہیں آتی۔ یہ پرانے قارئین کی آواز سننا ہے، تلاوت نہیں۔“

انہوں نے مزید وضاحت کی کہ اگر ہم اذان کی ریکارڈنگ چلائیں اور وقت پر مائیکروفون سے نشر کریں تو کیا یہ اذان شمار ہوگی؟

“نہیں، یہ اذان نہیں ہوگی۔ اسی طرح، اگر ہم کسی خطبے کی ریکارڈنگ چلائیں اور اسے جمعہ کے دن نشر کریں، تو کیا یہ کافی ہوگا؟ نہیں، یہ کافی نہیں ہوگا، کیونکہ یہ ماضی کی آواز ہے، جیسے کسی نے لکھا ہو یا قرآن رکھا ہو، لیکن یہ تلاوت کے زمرے میں شمار نہیں ہوگا۔“

خلاصہ:
گھر میں سورۃ البقرہ کی اصل فضیلت حاصل کرنے کے لیے ضروری ہے کہ کوئی شخص خود تلاوت کرے، کیونکہ ریکارڈ شدہ آواز سننا اس مقصد کو پورا نہیں کرتا۔ تلاوت کے ذریعے گھر کو شیطان سے محفوظ رکھنے کے لیے لازم ہے کہ قرآن پاک کی تلاوت خود کی جائے۔

(صحیح مسلم: 780)